Бас қаламыз Астанада қайырымдылыққа бағытталған жаңа бір жоба іске қосылды. Елорда әкімі Әсет Исекешев бастаған қала басшылығы мен әкімдік қызметкерлері «Астана – мейірімді қала» жалпыхалықтық ізгілік ациясын қолға алды.
Қазақстан мұсылмандарының қара шаңырағы – діни басқарма да осы жобаға қосылды. Айта кетсек, ҚМДБ бүгінгі күнде мұқтаж адамдардың жоқ-жітігін бүтіндеп, қарайласуды басты бағдарға алып, ізгілік шараларын ұдайы ұйымдастырып келеді.
Осы бағыттағы ізгі шараларды дәстүрге айналдырған ҚМДБ өкілдігі, «Нұр Астана» орталық мешіті жыл сайын қаладағы тұрмыс-тіршілігі төмен отбасыларға азық-түлікпен, материалдық және рухани тұрғыдан қолдау көрсетеді. Қала әкімдігімен бірлескен «Астана – мейірімді қала» акциясы аясында тұрмыс жағдайы төмен 4 отбасына қыстық отын-көмір, азық-түлік пен қаржылай көмек көрсетілді.
Қайырымдылық шарасына ҚМДБ наиб мүфтиі, Астана қаласының бас имамы Наурызбай қажы Тағанұлы, наиб имам Руслан Байұзақ және мешіт жамағаты қатысты. Отбасыларды аралап, көңіл-күйлерін білген дін қызметкерлері мұқтаж жандарға көмек қолын созуға әрқашан да әзір екендіктерін жеткізді. Имандылық үйінің ізгілікті істеріне разы болған жандар риясыз алғыстарын айтты.
«Нұр Астана» орталық
мешітінің баспасөз қызметі