24 қазан. АСТАНА. Ummet.kz – Қазақстан мұсылмандары діни басқармасының жүлдесі үшін қазақ күресінен Республикалық V турнирдің билеті сатылымда, деп хабарлайды ummet.kz тілшісі.
Қазақстан мұсылмандары діни басқармасының ұйымдастыруымен қазақ күресінен жылда өтетін дәстүрлі дода биыл Астана қаласының 20 жылдығына сәйкес келіп отыр. Ұлттық құндылығымызды дәріптейтін осынау шараға барша ұлттық спорт жанашырлары мен спортсүйер қауымды қазан айының 28-де «Дәулет» спорт кешеніне шақырамыз. Басталар уақыты сағат 11:00.
Шаршы кілем үстінде Айбек Нұғымаров, Мұхит Тұрсынов, Еламан Ерғалиев, Руслан Абдуразақ бастаған Азия чемпионы, «Қазақ барысының» жүлдегерлері мен аймақ жеңімпаздары күш сынасады.
Еліміздің 19 өңірінен келетін қырыққа жуық балуанды қолдауға қазақтан шыққан тұңғыш Олимпиада чемпионы, спорт шебері Жақсылық Үшкемпіров, қазақ күресінен Әлем және Азия чемпионы, «Қазақ барысының» үш дүркін жеңімпазы Бейбіт Ыстыбаев, айтыскер ақын Аманжол Әлтаев, тележүргізуші Бейбіт Құранбек, әнші Қайрат Нұртас, Қуандық Рақым және Ұлытау тобы келеді.
Балуандардың шеберлігін тамашалау үшін билеттерді topticket.kz сайтынан ала аласыздар. Сондай-ақ, Керуен, Керуен сити ойын-сауық орталығының, Жастар сарайы мен Конгресс-Холл кассаларынан сатып алуға болады.
Билеттен түскен қаражат науқас балалардың еміне, қарттар үйіне, жетімдер үйіне, көп балалы отбасыларға қайырымдылық мақсатта жұмсалады.