14 қазан. Нұр-Сұлтан. Ummet.kz – Теміртаудың тарихи-өлкетану музейінде ашылған көрменің төрінен көне жәдігер – Құран кітабы орын алды, деп хабарлайды egemen.kz сайтына сілтеме жасаған ummet.kz тілшісі.
Өткен ғасырдың басында жарық көрген қасиетті мұраны мұражайға осыдан 20 жыл бұрын мешіттің наиб имамы Әбдуәли Асанов тапсырған екен.
«Құран тек араб тілінде ғана қасиетті саналады. Оның аудармасы әлемнің 100-ден астам тілінде бар. Ал мұражайдағы бұл кітап 114 сүреге жинақталған 6200 аяттан тұрады. Сүрелердің өзі Мекке және Медина сүрелері болып бөлінген», – дейді музейдің экскурсиялық-бұқаралық бөлімінің меңгерушісі Гүлім Сыздықова.
Айта кететін бір жайт, Құранның көне көшірмесі бүгінге дейін толық күйінде сақталмаған. Мұражайдағы кітап тек ортаңғы бөлігі ғана. Онда араб тілінде жазылған 60 тарау бар.
Рухани келісім күніне арналған аталмыш экспозиция қазан айының соңына дейін жалғасады.