Салауатты өмір салты – мұсылман мәдениетінің мәйегі. Тән мен жанның саулығын Жаратқаннан берілген нығметті аманат деп ұғынатын Астана қаласының дін қызметкерлері рухани қызметпен қатар, спорттық сайыстарға ерекше ден қояды. ҚМДБ наиб мүфтиі, елорданың бас имамы Наурызбай қажы Тағанұлы осындай игі мақсатта бірнеше жыл қатарынан қала мешіттері мен медресесі қызметкерлері арасында әртүрлі спорттық жарыстарға пәрмен беріп келеді.
Бүгін де наиб мүфти Наурызбай қажы Тағанұлының тапсырмасы аясында "Әл-Ғани" мешітінің ұйымдастыруымен, Астананың 8 мешітінің жамағаты мен имамдары және «Астана» медресесі қызметкерлерінің арасында «Теңбіл доп» футбол турнирі өтті. Жарысқа 10 команда қатысты.
Командалық бағыттағы жарыстың ашылу салтанатында «Нұр Астана» орталық мешітінің наиб имамы Нұрлан Рамазан шараның мақсаты жайында айтып өтті. «Баршаға белгілі, дініміз құлшылықпен бірге дүние тіршілігінде игілікке жарайтын іс-әрекеттерді құптайды. Спорт – осындай маңызды шараның бірі. Алайда, жарыстың биік тұғыры – бірлікте. Бірлік пен салауаттылықты қатар ұстануымыз бізді биіктерге жетелей түседі» деп ойын алаңына құлшынған командаларға дем берді.
Жанкүйерлердің қызу қолдауы мен қошеметімен өткен аламан жарыс қорытындысында Әл-Ғани мешітінің «Есіл» командасы 3 орынға, Кунта Қажы мешітінің «Арландар» командасы 2 орынға, ал Әзірет Сұлтан мешітінің «Сұлтан» командасы 1 орынға ие болып, жеңіс кубогы табысталды. Жеңімпаз командалар ақшалай және арнайы дипломмен марапатталды. Сондай-ақ, жарысқа белсенді қатысқан өзге де командаларға ынталандыру сыйлықтары мен сертификаттар берілді.
«Нұр Астана» орталық
мешітінің баспасөз қызметі