Құранда «Бақара» сүресі 187-аятында: «Әйелдер сендерді бүркейтін киім (секілді), сендер де олар үшін дәл сондай киім секілдісіңдер» делінген.
Осы аяттағы ‘’киім’’ сөзінің қолданылу хикметіне ой жүгіртіп көрдім. Жалпы киімнің 3 негізгі функциясы бар екен:
(1) ұятты жеріңді жауып, жасырып тұрады;
(2) жаурасаң жылу болады;
(3) көрік береді.
Жаратушының жұбайлардың дәл осылайша бірбіріне киім сияқты екенін айтып, теңегені қандай ғажап! Шынында да солай ғой, әйелің не күйеуің:
(1) сенің кемшіліктеріңді жасырып тұрады, бір-біріңді толықтырып тұрасыңдар;
(2) өмірдің қиын-қыстау кездерінде, аспанда бұлт үйіріліп, жүректер мұздағанда, жылы сөз айтып, қолдайды, жаныңа жылу сыйлайды;
(3) қоғамда көркің болады, сәніңді келтіреді, абыройыңды арттырады.
Киімдеріміз таза, әдемі, ыңғайлы болсын дейміз.
Киім дегеннен шығады. Жар таңдау асылында киім таңдауға ұқсайды. Саған киім керек екенін сезе бастайсың. Мысалы, жаураған кезде, бозбала шақта кигенің тар бола бастағанда, бір дискомфорт сезіне бастағанда. Сосын киім сататын дүкенге барып, өзіңе қажет киімді іздей бастайсың. Егер нақты қандай киім керек екенін білмесең, қиын. Білсең, жұмысың жеңілдейді. Бірақ оны нақты білсең де, дәл сондай киім бұл қалада бар ма, сол мәселе шығады. Қайткен күнде де іздеуді жалғастыра бересің. Кейбіреулерге бәлкім көмекші керек шығар. «Мынаны таңда, мынау дұрыс» деп ақыл-кеңес беретін. Себебі ол өзіне сенімсіз, тәжірибесі жоқ немесе киімге деген талғамы жоқ.
Сөйтіп шамамен қандай киім керек екенін анықтап алдың дейік. Сосын өзіңе ұнаған киімдерді киіп көре бастайсың. Біреуі сәл кеңдеу, енді біреуі қысып тұр. Негізі адам киім шап-шақ болғанда, бәрі келісіп, жараса қалғанда, іштей сезеді. «О, іздеп жүргенім міне осы» деп. Бұл сезімді сөзбен айтып жеткізу қиын. Бірақ әркім оны сезіне алады, сол кезде түсінеді деп ойлаймын. Сосын ойланбастан сол киімді таңдасаң болады. Бағасы қымбат болса да, ал.
материал «Не үшін үйлену керек?» кітабынан алынды,
ummet.kz