Бүгін «Нұр Астана» орталық мешітінде астаналық жамағат пен қала қонақтары Қадір түнін қарсы алуға жиналды. Қасиетті Қадір түніне жиналған жамағаттың санында шек болмады. Құптан намазын мешітте оқуға ниет еткен жамағат тарауық намазына қатысып, бір сапта тұрып құлшылық жасады. Мың айдан да қайырлы Қадір түнін өткізуге келген мұсылман қауымының белсенділігі шынымен қуантты.
Аллаға алғысын айтып, жайнамаз үстінде шүкіршілік айтып, жылап жатқан жандардар құдды бір әсерлі суреттей көпшілікке ерекше ой салды, ойландырды. Бұл түні жасалатын дұғалардың қабыл болатынына нық сеніммен келген әрбір мұсылман жүзінен мейірім мен шүкіршілікті байқауға болады. Алла Елшісі (ﷺ): «Түнгі намазға аса маңыз беріңдер. Оны сендерден алдыңғы өткен ізгі кісілер үнемі орындап жүретін. Түнгі намаз – Жаратушыларыңа жақындатады, жамандықтарыңды өшіреді және күнәлі істерге баруға тосқауыл болады» деген еді. Намаздан соң жиналған жамағатқа «Нұр Астана» мешітінің бас имамы Наурызбай қажы Тағанұлы «Оразадан кейінгі жағдайымыз», «Иманның анықтамасы мен ләззаты» тақырыптарында уағыз, насихат айтылды. Мешітке сыймай қалған жамағат мешіт сыртына арнайы орналастырылған лед экрандардан уағыз тыңдауға мүмкіндік алды. Міне, осылайша биылғы Қадір түні де асыл дініміздің тарихына айналып үлгерді. Бүгін мешітке жиналған жамағаттың жүрекпен жасаған құлшылықтары қабыл болғай! Түнгі намаздан жүрек тыныштығын тапқан әрбір мұсылыманға Алла разы болсын!
ummet.kz