Қазақстан мұсылмандары діни басқармасының төрағасы Наурызбай қажы Тағанұлы Алматы облысына барған сапарында Қонаев қаласында «Жүрек жылуы» қайырымдылық іс-шарасына қатысып, көпбалалы, жалғызбасты Бибіназ Шамұратоваға пәтер кілтін табыстады.
«Зекет және қайырымдылық» қорының ұйытқы болуымен, демеушілердің көмегімен алынған үйдің кілтін табыстау салтанатында Бас мүфти Наурызбай қажы Тағанұлы: «Біз «Қайырымдылық жасасаң, қайырын өзің көресің» деген аталы сөзді өмірлік ұстанымға айналдырған халықпыз. Қазақстан мұсылмандары діни басқармасы күнделікті жұмысында жеті бағытқа басымдық береді. Соның бірі – уақып және қайырымдылық бағыты. Біз қашан да өз мүмкіндіктеріміз аясында азаматтарымызға көмек беруге дайынбыз. Жаңа баспанаңыз құтты болсын. Іші жанға, сырты малға толып, берекелі үйлердің бірі болғай. Әмин!» деді.
