Қазақстан мұсылмандары діни басқармасының төрағасы, бас мүфти Ержан қажы Малғажыұлы Қызылорда өңіріне іс-сапармен келді, деп хабарлайды «Ақмешіт-Сырдария» орталық мешітінің баспасөз қызметі.
Сыр еліндегі сапары барысында бас мүфти өңірдің өкіл имамы Талғат Омаровпен кездесіп, дін ахуалымен танысты. Сонымен қатар, облыс әкімі Қырымбек Көшербаевпен де жүздесіп, аймақтың тыныс-тіршілігі мен алдағы жоспарлары жайында пікір алмасты.
Аймақ басшысы Қырымбек Елеуұлы ҚМДБ-ның төрағасына еліміздегі діни тұрақтылық пен, ұлтаралық татулықты сақтаудағы ерен еңбегіне алғыс білдіре отырып, Сыр аймағындағы ахуалдың тұрақтылығы жолындағы Қызылорда облысы бойынша өкілі, орталық «Ақмешіт-Сырдария» мешітінің бас имамы Т.Омаровтың іскерлігіне ризашылығын жеткізді.
Бас мүфтидің сапары мұнан соң Нағи Ілиясов ауылында жалғастырды.
ummet.kz-ақпарат