ҚМДБ Уағыз-насихат бөліміне қарасты Әйел-қыздар секторының ұйытқы болуымен соңғы екі айда республика бойынша 2204 іс-шара өтті.
Атап айтқанда, «Отбасы», «Бала тәрбиесі», «Ерлі-зайыптылар арасындағы байланыс», «Әжелер тәрбиесі», «Құран Кәрімді оқып үйрену» сынды тақырыптарда 1375 офлайн дәріс өтіп, 573 онлайн форматта насихат айтылса, 127 қоғамдық іс-шара өтті.
«Карантиндік шектеулердің жеңілдетілуіне байланысты еліміз бойынша әйел жамағатына арналған офлайн уағыз-насихат айтарлықтай көбейіп отыр. Жыл басында 70-ке жетер жетпес офлайн дәрістер өтіп, керісінше, онлайн уағыздар көптеп айтылса, Аллаға шүкір, қазір мешіттерімізде сабақ жүргізуге толықтай мүмкіндік алып отырмыз. Індет қаупі күшейіп кетпес үшін іс-шараларымызда, уағыз-насихат жұмыстары мен әртүрлі кездесулерде барлық санитарлық талаптардың сақталуына көңіл бөліп келеміз» дейді Әйел-қыздар секторының меңгерушісі Ақбөпе Тілегенова.
Сондай-ақ Әжелер алқасының ұйымдастыруымен 9 тағылымды іс-шара өтсе, жат ағым жетегінде кеткен әйелдермен 25 кездесу өткізілді.
