Павлодар қаласында күндердің сұлтанында жұма намазы санитарлық талаптарға сай «Мәшһүр Жүсіп» мешітінің ауласында өтті.
Жұма намазының алдында наиб имам Қанат Қабаев бекітілген жоспар бойынша «Өліге құрмет – тіріге міндет» тақырыбында жұма уағызын айтты. Келесі кезекте Павлодар қаласындағы «Мәшһүр Жүсіп қарилар даярлау орталығының» шәкірті Нұржігіт Сәдуақасовтың 2020-2021 оқу жылында Алланың кәләмі болған қасиетті Құран Кәрімнің 114 сүресін бастан-аяқ толығымен жаттап қари болғанын жамағатқа сүйіншілеп, мешіт жамағаты мен демеушілері атынан қаржылай сый-сияпат тапсырды.
Бүгінгі таңда «Мәшһүр Жүсіп Қарилар даярлау орталығында» он шақты шәкірт білім алуда. Орталықтың бағытына сәйкес Құран, Құран тәпсірі, тәжуид, ақида, хадис секілді пәндер оқытылады.
