Адамдар махшарға жалаңаш, жалаңаяқ, сүндеттелмеген күйде жиналады.
Ибн Аббас (Алла әкесі екеуіне разы болсын) риуаят еткен хадисте Пайғамбар (с.а.с.): «Расында, сендер (сол күні) жалаңаяқ, жалаңаш, сүндеттелмеген халде жиналасыңдар», – деп: «Әуел бастағыдай қайта жаратамыз. Бұл – Бізге бір міндет. Шынында, Біз орындаймыз», – деген аятты оқыған. Айша анамыз (Алла оған разы болсын) бұл сөзді естіген кезде: «Уа, Алланың елшісі! Еркек-әйелдің барлығы (сол кезде) бір-біріне қарайды ма?» – деп сұрайды. Сонда Пайғамбар (с.а.с.): «Ей, Айша! (Ол кездегі) жағдай олардың бір-біріне қарауларынан ауырырақ болады», – деп жауап берген екен.
Кейбір хадистерде әрбір адам өлген кездегі киімімен қайта тіріледі деген хабар бар. Әбу Сағид әл-Худри (Алла оған разы болсын) өлім үстінде жатқанда, жаңа киім алдырып киіп: «Мен Алла елшісінің (с.а.с.): «Мәйіт өлген кездегі киімінде қайта тіріледі», – дегенін естігенмін», – депті.
Алайда кейбір ғұламалар: «Ақыреттегі киіну – өлген кездегі киімде немесе кебінде қайта тіріледі дегені емес, бәлкім, өлген кездегі иманына байланысты киінеді», – дейді.
материал «Ақырет өткелдері» кітабынан алынды,
ummet.kz