Сахаба Абдулла ибн Ъамрдің риуаят етуі бойынша, Алла елшісі (с.ғ.с) былай дейді:
«Қайсыбір мұсылман жұма күні күндіз немесе түнде қайтыс болса, Алла ол пендені қабір азабынан (фитна) құтқарады». [1]
Ғалымдар былай дейді: Жұма – тозақ есіктері жабылып, оты сөнетін күн. Алла тағала кімнің жанын жұма күні алған болса, қабірдегі өмірінің баянды өтетіндігіне дәлел. Бұнымен қатар, жұма күні қайтыс болған кісілерге берілетін сауаптың дәрежесі - Алла жолында шейіт болғандардың сауабымен пара-пара[2].
Ендігі жерде қабір азабынан құтылды деген сөз – қиямет күні пейішке кіреді дегенді білдіреді ме? Ардақты Пайғамбарымыз (с.ғ.с) өзінің асыл сөзінде:
«Қабір – ақірет өмірінің әуелгі сатысы. Қабір азабынан құтылған адам, одан кейінгі (ақірет) өмірінде де жеңілдік көреді. Ал, құтыла алмаса, (ақіреттегі) өмірі қабірдегіден де қиын болмақ», - деген [3].
Айтылған хадистерден мынадай қорытындыға келуге болады: Жұма күні қайтыс болған кісі Алланың қалауымен қабір азабынан құтылып, қияметте жұмаққа кіреді.
[1] Тирмизи – №1080 хадис
[2] Тухфатул Әхуази – №1080 хадис түсіндірмесі
[3] Тирмизи №2410 хадис
Абдусамат Қасым