Қазақстан мұсылмандары діни басқармасының төрағасы, Бас мүфти Наурызбай қажы Тағанұлы елордадағы «Әбу Насыр әл-Фараби» мешітінде жұма намазын жүргізді.
«Адам баласы Жаратушысын танып, Оған құлшылық еткеннен кейін, ең алдымен ата-анасына жақсылық жасап, олардың ризалығын алуға бұйырылған. Алла Тағала қасиетті Құранның «Ниса» сүресі, 36-аятында: «Алла Тағалаға құлшылық етіңдер әрі Оған еш нәрсені ортақ қоспаңдар және ата-анаға ең көркем түрде жақсылық жасаңдар», – деп айтқан.
Алла Тағала бізді жаратқан, ал ата-ана бұл дүниеге келуімізге себепші болған. Абдулла ибн Масғуд (Алла оған разы болсын) былай деген: Бір кісі Ардақты Пайғамбарымыздан (оған Алланың салауаты мен сәлемі болсын): «Алла Тағалаға ең сүйікті амал қандай?» – деп сұрады. Сонда ол: «Уақытылы оқылған намаз және ата-анаға жақсылық жасау», – деп жауап берді (имам Бұхари)»,- деді Наурызбай қажы Тағанұлы.
Жұма намазынан кейін Бас мүфти мешіт жамағатымен бірге ел амандығы мен тыныштығы үшін дұға жасады.
