29
Жұма,
Наурыз

һижри

11. Қазамен бірге кәффарат міндетті болатын жағдайлар

Ораза

Мына жағдайларда оразаның қазасымен қатар кәффаратын өтеу талап етіледі:

1. Түнде ораза ұстауға ниет еткеннен кейін тәуліктің ауыз бекітетін бөлігінде[1] ораза екенін біле тұра[2] жыныстық жақындықта болу.[3]

Ері жақындасуды қалап, әйелі оның талабына көнген жағдайда[4] екеуі де қазамен бірге кәффаратын өтейді.[5]

Ері жақындасқанға мәжбүрлеген жағдайда[6] әйелі кәффарат-сыз тек қазасын өтейді. Еріне қазамен бірге кәффарат міндетті болады.[7]

Әйелі жақындасуды қалап, ерін соған көндірген жағдайда екеуі де қазамен бірге кәффаратты өтеуі тиіс.[8]

2. Тәуліктің ауыз бекітетін бөлігінде[9] ораза екенін біле тұра[10] ішіп-жеу.[11] Бұл ешбір үзірсіз, тек қарыны ашқаны немесе шөлдегені себебінен ішіп-жеген адамға қатысты. Ал үзірге Хақ Тағаланың: «Сендерден біреу науқас немесе жолаушы болса, ораза ұстамаған күндерін басқа күндерде ұстайды»,-дегеніне сай,[12] ауыз бекіткен адамның сапарға шығуы не болмаса науқастанып, дәрі ішуге мәжбүр болғаны жатады.[13]

Тәуліктің ауыз бекітетін бөлігінде дәрі ішуге мәжбүр болған адам тек сол күннің қазасын өтеп, оған кәффарат міндеттел-мейді.[14]

Жол жүретін адам сапарға шыққаннан кейін ауыз ашса болады. Бұл жағдайда да ол тек сол күннің қазасын өтейді. Сапарға шықпастан бұрын ауыз ашқан жағдайда қазамен бірге кәффаратын өтеуі міндетті болады.[15]

Ораза кезінде темекі тарту мәселесіне келер болсақ, біреулер: «Ішіп-жемесең және әйеліңмен жақындаспасаң болды. Темекі тамаққа жатпайды»,-дейді. Ал ақиқатында шариғат бойынша ораза бола тұрып темекі тартқан адам қазамен бірге кәффаратын өтеуі тиіс.[16]

Абдуссамад Махат

«Нұр Астана» мешітінің наиб имамы

 



[1]яғни, таң атқаннан күн батқанға дейінгі аралықта.

[2]яғни, қасақана.

[3]«Фиқһүл-ъибадат ъаләл-мазһабил-ханафи», «Әл-фиқһу ъаләл-мазаһибил-арбаға».

[4]яғни, жақындасқанға қарсылық етпеген.

[5]«Фиқһүл-ъибадат ъаләл-мазһабил-ханафи».

[6]яғни, әйелі ораза парыз екенін ескерсе, алайда ерінің талабына мәжбүрлікпен көнсе.

[7]«Фиқһүл-ъибадат ъаләл-мазһабил-ханафи».

[8]Бұл да сонда.

[9]яғни, таң атқаннан күн батқанға дейінгі аралықта.

[10]яғни, қасақана.

[11]«Фиқһүл-ъибадат ъаләл-мазһабил-ханафи», «Әл-фиқһу ъаләл-мазаһибил-арбаға».

[12]«Бақара» сүресі, 184 аят.

[13]«Әл-фиқһу ъаләл-мазаһибил-арбаға».

[14]Бұл да сонда.

[15]Бұл да сонда.

[16]«Фиқһүл-ъибадат ъаләл-мазһабил-ханафи».

Бөлісу: