Алла елшісі (с.ғ.с) айтады: «Хақ Тағала жалған сөйлеген және жалғандықтан тыйылмаған пенденің ішпей-жемей жүргенін қажет етпейді». (Әбу Мусадан (р.а) Имам Бухари риуаят етті).
Түсініктеме: Имам Әл Хафиз жалған сөйлеу - өтірік айту», - десе, Имам Әт-Тоййиби (р.а) «жалған сөйлеуді» мына істерге қатысты еткен:
- күпірлік сөз;
- жалған куәлік;
- жала жабу;
- ғайбаттау;
- өтірік айту;
- лағнеттеу сияқты шариғат тыйым салған барша амал. Негізінде күнәлі істің бәрі жағымсыз қылыққа жатады.
Алла Тағала өтірік пен жаман қылықтан тыйылмаған адамның оразасын қажет етпеуі - оразасын қабыл етпеуі. Негізі Хақ Тағала ешнәрсеге мұқтаж емес. Бірақ хадисте «қажет етпейді» делінген.
Бұл бейнелі түрде айтылған сөз. Өйткені хадистің мақсаты: жалған сөйлеу секілді күнәлі іске барудан сақтандыру («Фатхүл-Бари» шарху «Сахихил Бухари»)
Алла Тағала харам істерден (өтірік айту, ғайбат, ұрлық, зиянды әрекеттер) тыйылмай, тек тамақ пен сусыннан шектелумен шектелген, жүрегі мен іс-әрекеті түзелмеген оразаны қажет етпейді.
Алла Тағалаға қажет емес (қабыл болмайтын) ораза түрлері:
- Тіл мен жүректі тыймаған ораза: Өсек, ғайбат, өтірік айту, біреуге тіл тигізуді тоқтатпағандардың оразасы.
- Дене мүшелерін харамнан тыймаған ораза: Көзді арамнан, құлақты жаман сөзден, қол мен аяқты күнәлі істерден сақтамаған ораза.
- Ниеті дұрыс емес ораза: Алланың разылығы үшін емес, елге көріну (рия) немесе диета ұстау мақсатында тұтылған ораза.
Оразаның мақсаты – аштық арқылы нәпсіні тәрбиелеп, күнәлардан арылу және тақуалыққа жету.
материал «Ораза туралы жетпіс хадис» кітабынан алынды,
ummet.kz
