Алла елшісі (саллаллаһу аләйһи уә сәлләм): «Бұл айда төрт түрлі қасиетті көбейтіңдер. Оның екеуі Раббыларыңды разы ететін қасиеттер: шаһадатты және истиғфарды көп айтып жүріңдер. Енді екеуі өздеріңе аса қажетті қасиет: Раббыларыңнан жұмақты сұраңдар да, тозақтан азат етуін тілеңдер!» деген.
Енді осы хадисте айтылған төрт қасиеттің алғашқы екеуіне қысқаша ғана тоқтала кетейік:
1. Хадисте тілге тиек етілген «шаһадат», яғни адамның мұсылмандығын білдіретін «әшһәду ән лә иләһә иллаллаһ, уә әшһәду әннә Мухаммадән абдуһу уә расулуһу» (Алладан басқа тәңір жоқ, Мұхаммед оның құлы әрі елшісі екеніне куәлік етемін) деген куәлік сөзі. Бұл – Ислам діннің негізгі сүйенетін тірегі, негізі мен кілті. Мұсылман болғысы келген адам осы куәлік сөздерін айтып, иман негіздеріне шын көңілден сенуі қажет қасиетті сөз. Ол – ақыретте тозақ отынан азат етіп, мәңгілік бақытқа қол жеткізуге себепкер салмағы ауыр сөз.
2. Бәріміз пендеміз, күнәға, қателікке бой алдырмай тұрмаймыз. Пайғамбарымыз (саллаллаһу аләйһи уә сәлләм) «Адам баласының барлығы да қатеге (күнәға) бой алдырушы, ал олардың арасында жақсылары – тәубе етушілері» деп Аллаға истиғфар ету (кешірім тілеу) қажет екенін атап өткен. Тіпті Алла елшісі (саллаллаһу аләйһи уә сәлләм) күнә жасамаған күннің өзінде үмбетіне өнеге көрсету үшін «Мен күніне жетпіс реттен артық тәубе етіп, истиғфар тілеймін» деген. Рақымы шексіз Алла Тағала құлының тәубесіне разылық танытып, мейірім қақпаларын ашады. Пайғамбарымыз (саллаллаһу аләйһи уә сәлләм): «Истиғфар (әстағфируллаһ) айтуды әдетке айналдырып, көп оқитын адамды Алла Тағала дерттерден, қиыншылықтардан құтқарады. Оны ойламаған жерден ризықтарға қауыштырады», «Күнә көңілде із қалдырады, тәубе және истиғфар еткенде ол дақ жойылып, көңіл тазарады» (Тирмизи) деген. Ғалымдарымыз истиғфар тілеудің мынадай пайдаларын атап көрсеткен:
- Алланың кешіріміне ие болады;
- Дүниелік істерде таршылық көрмейді;
- Қанағатшыл, сабырлы болады;
- Күнәлі істерді жасаудан өзін тыяды;
- Аллаға жақындай түседі;
- Дұғаларының қабыл болуына себеп болады;
- Рухани тазарады;
- Жүрегі жұмсарып, мейірімді болады.
Осы қасиетті айда «куәлік» сөзі мен истиғфарды көбейтіп, Алладан жаннатты сұрап, тозақтан сақтауын тілеуді көбейте түсу бізді Аллаға жақындата түспек.
материал «Рамазан айы және әйелдерге тән мәселелер» кітабынан алынды,
ummet.kz
