Елорданың ызғарлы күнінде «Әбу Насыр әл-Фараби» мешітінің ұжымы қаламыздың тазалығын қамтамасыз етіп отырған еңбеккерлерге сый-сияпат жасады. Қайырымдылық шарасын ұйымдастырған мешіт ұжымы 15 тазалық қызметкерлеріне сиыр етін үлестірді.
Игі бастаманың мақсаты – ауа-райының қолайсыздығына қарамастан күн-түн демей қала тазылығы мен тұрғындар игілігі үшін қызмет жасап жатқан жұмыскерлерге қамқорлық танытып, жылулық сыйлау.
Қолымыздан келгенше жақындарымызға, тіпті танымасаңыз да мұсылман бауырыңызға жәрдем жасап, көмек қолын созу – мұсылмандықтың белгісі. Пайғамбарымыз (оған Алланың игілігі мен сәлемі болсын) былай деген: «Ең игі істер: мұсылман бауырыңа қуаныш сыйлау – оның қарызын өтеу, оны тамақтандыру» деген еді (Байһақи). Осы өсиетке амал етіп келе жатқан мешіт ұжымына қала тазалықшылары алғыстарын айтып, ризашылықтарын білдірді.
ummet.kz
