Қарттарға құрмет көрсету – мұсылманшылықтың көрінісі. Асыл дініміз Ислам әрқашан үлкендерге мейірімділік танытуға шақырады. Қазақстан мұсылмандары діни басқармасының Астана қаласы бойынша өкілдігі «Нұр Астана» орталық мешіті қарияларға құрмет көрсету шараларын жамағатпен бірлесіп әрқашан іске асырып келеді. Көктемнің алғашқы күндерімен бастау алған "Аналар -асыл жандар" атты он күндік декада және "Астана мейірімді қала" қоғамдық бастамасы аясында кеше наиб мүфти Наурызбай қажы Тағанұлы бастаған «Нұр Астана» орталық мешітінің ұйымдастыруымен, қала сыртындағы қарттар мен мүгедектерге арналған Малотимофеевка медециналық-әлеуметтік мекемесінде болды. Айтулы қайырымдылық шараға құр қол келмей, мерекелік көңіл-күй сыйлады. Игі шара басында ҚМДБ-ның наиб мүфтиі, «Нұр Астана» орталық мешітінің бас имамы Наурызбай қажы Тағанұлы қарттарға ізгі тілегін айтты.
Қанаттыға қақтырмай, тұмсықтыға шоқтырмай, жығылған да алақанын тосатын адам, Алладан кейінгі екінші қамқоршысы – әр баланың ата-анасы. Қасиетті Құран Кәрімде бұл жайында былай дейді «Раббың өзіне ғибадат етуді, ата-аналарыңа жақсылық қылуларыңды әмір етті. Ал, егер, ол екеуінің бірі немесе екеуіне де кәрілік жетсе оларға «түһ» демеңдер (кейімеңдер)» деп ескертеді. («Исра» сүресінің 23-аяты). Осы аятың ата-анаға деген құрметтің деңгейі ерекше жоғары екенін көрсетеді. «Қарттар – біздің асыл қазынамыз. Біз қарияларымызды тек осындай мерекелерде ғана елеп-ескермей, әр уақытта көңілдерін тауып, қуантып, батасын алып жүруіміз керек. Себебі «Атасыз үй – батасыз, анасыз үй – панасыз» деген қазақ халқында қарттарын қазынасына балап қастерлегені белгілі»,-деп, өмірдің әр қилы жағдайларымен жалғыз қалған қарияларға жүрекжарды жылы лебізін білдірді.
Астана қаласы әкімдігі Дін істері басқармасының басшысы Данияр Есін де осы қайырымдылықтың куәсі болып, әрбір қария біздің атамыз, шашына ақ түскен әрбір қарт ана біздің әжеміз, сондықтан да «үлкенге құрмет» көрсету біздің борышымыз деп ізгі тілегін білдірді.
Игі шара аясында ҚМДБ «Әйел-қыздар секторы»-на қарасты, «Нұр Астана» орталық мешітінің «Жібек» қыз-келіншектер клубы, Қарттар үйіндегі 150-ге жуық қарияға мерекелік дастарқан жайып, әннен шашу шашып, сый-сияпат жасады. Төсек тартқан кісілерге бөлек сый-сияпат жасалып, құшақтарын гүлге толтырды.
Бүгінгі игі шара жалпы адамзатты қарт кісілерге көңіл бөлуге, ізет білдіріп, арнайы келіп, жабыққан көңілдеріне демеу болуға шақырып, осы арқылы олардың да өмір жылуын, қамқорлық пен мейірімділікті сезінуін мақсат етеді. Рухани кештен жақсы әсер алып, қуанып қалған қариялар мешіт ұжымына алғыстарын айтып, ақ батасын берді.
«Нұр Астана» орталық мешітінің
баспасөз қызметі
