"Нұр Астана" орталық мешіті отбасы күнін атап өтті

Іс-шараның ұйытқысы болған – ҚМДБ Астана қаласы өкілдігі «Нұр Астана» орталық мешіті мен  ҚМДБ Жастар ісі бөлімі Әйелдер-қыздар секторының «Нұр Астана» орталық мешітіндегі «Жібек» қыз-келіншектер клубы.

Отбасы күніне арналған жиын басында қасиетті Құран аяттары оқылып, наиб имам жанұялардың берекесін, шаңырақтың шаттығын, баршаға әке-ана бақытын тілеп жамағатқа бата берді. Алғашқы құттықтау сөз кезегі республикалық Ардагерлер кеңесінің төраға орынбасары, «Нұр Астана» орталық мешітіндегі Ақсақалдар кеңесінің құрметті мүшесі Өмірзақ Озғанбайұлына берілді. Өмірзақ қажы жастарға ақыл-кеңесін айтып, бақытты отбасы болудың сырымен бөлісті. Оның айтуынша, үйдегі тыныштық пен тұрақтылық ерлі-зайыптылардың сыйластығы мен даналығында жатыр. Яғни, ұрыстың шеті көрінсе, күйеуі де әйелі де, «менікі дұрыс» деп тұрып алмай, екі жақ та «ағаттық менен болды, бұл жағдайға мен кінәлімін» деп кішірейе білу керек.

- Әрбір отбасы – шағын мемлекет. Ол құнарлы топырақ іспетті. Береке-бірлік пен өзара түсіністік, махаббат орнаған жанұядан өсіп-өнетін жеміс те керемет болмақ. Ал жас жұптарға жол сілтеп, үлгі көрсету – үлкендердің міндеті. Бүгінгі ұйымдастырып отырған «Мерейлі отбасы» кездесуі де осы игі мақсатты көздейді, - дейді ҚМДБ наиб мүфтиі, «Нұр Астана» орталық мешітінің Бас имамы Наурызбай қажы Тағанұлы.  

Айта кету керек, биыл қаңтар айынан бастап «Нұр Астана» орталық мешітінде   607 отбасы некесін қиды. Ал, жылына мұнда орта есеппен 700-800 жұп бас қосып отбасын құрады.

Айтулы мереке - Отбасы күні қарсаңында бүгін біз жас жұбайлар - Руслан Сәкенұлы мен Әсел Рысбекқызының  некеқияр рәсіміне куә болдық. Жастардың некесін Астана қаласының бас имамы Наурызбай қажы Тағанұлы қиып берді. Көпшілік алдында некенің шарттары орындалып, құтбасы оқылды. Ал, махрге қалыңдық алтын алқа сұрады. Наиб мүфти жас отбасыға насихат айтып, өмірдің маңызды қадамымен құттықтады.

Бұдан кейін Наурызбай қажы Тағанұлы жаңа туылған нәрестенің құлағына азан шақырып, есім қою рәсімін өткізді. Дүниеге келген сәбиге Әлижан есімі берілді.

Сонымен бірге, шара барысында тәй-тәй басқан екі баланың тұсауы кесілді. Тұсау кесу құрметі Нұрияш қажы Нұрбергенқызы мен  Жанат Ермахановаға бұйырды.

«Мерейлі отбасы» кешінің соңында «Сый-қоржын» ұтысы көпшіліктің есінде қалды. Іс-шараға келген отбасылар арнайы талон алған болатын. Кездейсоқ таңдау бойынша жеңімпаздарға тұрмысқа қажетті сый-сияпаттар ұсынылды. Басты жүлдеге Мойылды шипажайына жолдама тігілді.

Бұл кештен ешкім құр қайтпады. «Нұр Астана» орталық мешіті әрбір келушіге отбасы құндылықтары, бала тәрбиесі, салт-дәстүрге байланысты діни-танымдық кітаптарды сыйға тартты.

Мәдина ЖАҚЫП, ummet.kz тілшісі