Қазақстан мұсылмандары діни басқармасының төрағасы Наурызбай қажы Тағанұлы «Астана» медресе-колледжінің шәкірттерімен кездесіп, болашақ дін қызметкерлеріне насихат айтты. Кездесуде ҚМДБ Төрағасы шәкірттерді терең білім алуға шақырып, игі ниетін жеткізді.
«Білім – амалдың негізі. Амалсыз білімнің пайдасы болмайтыны секілді білімсіз амалдың да еш пайдасы жоқ. Білім мен амал - бірін-бірі толықтырушы, бір-бірінен ажыратуға болмайтын егіз ұғым. Алла Тағаланы тану, Оның ризалығына жету жолына түскен адам терең білім алуға тырысады. Жаратушы Иеміз Құранда: «Алла сендердің араларыңнан иман келтіргендер мен білім иелерін жоғары дәрежелерге көтереді» («Мүжәдәлә» сүресі, 11-аят) деп баяндайды. Біз бұл аяттан Алла Тағала білімді адамның дәрежесін екі дүниеде көтеріп қоятынын түсінеміз. Құдайға шүкір, қазір білім алуға мүмкіндік көп. Ендеше, алтын уақыттарыңызды терең білім алуға арнасаңыздар өмірде көптеген игілікке кенелесіздер. Ғұлама бабаларымыз айтқандай, халыққа қызмет етуден асқан ғазиз іс жоқ» деді Наурызбай қажы Тағанұлы.
Айта кетсек, 2024-2025 жаңа оқу жылында «Астана» медресе-колледжіне 39 ұл және 26 қыз оқуға қабылданды. Бүгінде аталған оқу орнында 180 студент оқиды.
