Бүгін қасиетті жұмада Бас мүфти Наурызбай қажы Тағанұлы «Әбу Насыр әл-Фараби» мешітінде жұма намазына қатысты.
Жиылған жамағатқа «Ислам және отбасы» тақырыбында көркем насихат айтқан бас мүфти:
«Исламда отбасылық құндылықтарға ерекше мән берілген. Ерлі-зайыптылардың өзара міндеттері бекітілген. Алла Тағала Қасиетті Құранның «Бақара» сүресі, 187-аятында: «Олар сендер үшін киім (іспетті), сендер де олар үшін дәл сондай киім (секілдісіңдер)», - деп айтқан.
Дінімізде ерлі-зайыпты адамдардың атқаруы қажет болған міндеттері мен әдептері көп. Солардың ішінде шаңырақтың шаттыққа, отбасының бақытқа бөленуіне себепші болатын мынадай бес құндылыққа мән бергеніміз жөн: өзара жақсы мәміледе болу, өзара кешірімді болу, бір-біріне жақсы көңіл-күй сыйлау, бір-біріне сыйлық беріп тұру және ізгі ұрпақ тәрбиелеу.
Әр отбасында береке мен бірлік орын алуы үшін ерлі-зайыптылар арасындағы ақыларды орындау дінімізде ер мен әйелден бірдей талап етіледі. Алла Тағала қасиетті Құранның «Бақара» сүресі, 228-аятында: «Ерлердің әйелдердегі ақылары сияқты, әйелдердің де ерлерде белгілі ақылары бар», – деп айтқан. Ендеше, әрқайсымыз отбасымызды аманат деп біліп, оның сүйіспеншілік пен берекеде болуы үшін өзімізге жүктелген міндеттерімізді аса жауапкершілікпен орындауымыз қажет», - деді Наурызбай қажы Тағанұлы.
Жұма намазынан кейін бас мүфти ел амандығы мен игілігі үшін дұға жасады.
ummet.kz
