8 қаңтар. АСТАНА. Ummet.kz – ҚМДБ Түркістан облыстық өкілдігінің ұйымдастыруымен қаладағы «Жұма» мешітінің жамағаты бірігіп көп балалы отбасыға баспана сыйлады, деп хабарлайды ҚМДБ баспасөз қызметіне сілтеме жасаған ummet.kz тілшісі.
Шаңырақ иесін құттықтай барған облыс имамы жақсы жаңалық жеткізді:
«ҚМДБ тарапынан атқарылатын 4 бағыттың бірі – қайырымдылық. Осы бағыт бойынша өткен жылы имамдардың араласуымен облыс бойынша 12 баспана берілді. Түркістан қаласында 2 өртенген үйге жәрдем көрсетілді. Ал, осы жылы тағы бір отбасыға баспана əперу ниетіміз бар», - деді Мұсабек Ақтамберді.
Сондай-ақ, игі іске атсалысып, қайырымдылық еткен «Жұма» мешітінің жомарт жамағатына береке тіледі.
Ал, 6 баланың анасы Гүлназ Құдайбергенқызы далада қалдырмай, отау тарту еткен жұртшылыққа:
«Балаларыммен қанша жыл пәтерден пәтерге көшіп, көп қиындық көріп қиналдым. Енді міне, Аллаға шүкір бұл күнге де жеттік. Барша жәрдемші болған азаматтардан Алла Тағала разы болсын», - деп ақжарма тілегін жаудырды.
Қуанышқа ортақтасып келген ақсақалдар ақ батасын беріп, имамдар мен жергілікті жамағатқа ризашылықтарын білдірді. Құран оқылып, дəстүрге сай шүкіршілік дастарханы жайылды.
