28 маусым. Нұр-Сұлтан. Ummet.kz – ҚМДБ Төрағасы Серікбай Ораз Шымкентке жеткен бойда, тіке облыстық ауруханаға тартты. Арыстықтардың қал-жайын сұрасып, аз-кем сұхбаттасты, деп хабарлайды ҚМДБ баспасөз қызметіне сілтеме жасаған ummet.kz тілшісі.
Бас Мүфти:
«Бір ғана отбасыға емес, ұлтқа түскен сынақ болды. Аллаға шүкір, ауызбіршілік, ынтымағымыз бар екен, халық көтеріп те, бөлісіп те жатыр. Аман-есен айығып кетулеріңізге тілектеспіз. «Ауырып тұрдың – аунап тұрдың» деген бар. Әлі-ақ бәрі де ұмытылып кетеді. Бала-шағаларыңыздың, еліміздің несібесі үшін аман болыңыздар»,- деді.
Арыстағы жарылыс кезінде 165 адам жарақаттанған. Оның 15-і жансақтау бөлімінде жатса, тоғызының халі нашар.
Денсаулық сақтау министрі науқастарға Алматыдағы ғылыми-медициналық орталықтан екі мобильдік топ көмекке келгенін мәлімдеген. Бәрінің жағдайы мемлекеттік бақылауда.
Бүгін мерт болғандардың саны үшеуге жетті. Алла Тағала алдарынан жарылқасын, отбасыларына сабыр берсін деп тілейміз.
