Қазақстан мұсылмандары діни басқармасының ұйымдастыруымен Ақтөбе өңірінің зиялы қауым өкілдеріне, ақсақалдар мен әжелерге, сондай-ақ көше тазалықшылары, төтенше жағдай қызметкерлеріне және бұқаралық ақпарат құралдары өкілдеріне ауызашар берілді.
Бас мүфти Наурызбай қажы Тағанұлы өз сөзінде Діни басқарма Рамазан айының жиырма күнінде атқарылған іс-шараларға тоқталды. «Рамазан айында атқарылатын құлшылық түрі көп. Алайда соның ішіндегі ең маңыздысы – ораза ұстау. Оразаның мұсылман баласына тигізер мейірім-шапқаты мол. Ораза – Аллаға апарар жол. Ғұламалардан қалған мынадай сөз бар: «Намаз иесін жолдың ортасына дейін жеткізеді. Ораза иесін Алланың есігіне дейін жеткізеді. Ал садақа иесінің қолынан жетектеп, Алланың құзырына бір-ақ апарады». Демек ораза адамды Алламен қауыштырады. Намаз оқыған, ораза ұстаған һәм садақа берген адам Алланың сүйікті құлына айналады», – деді.
Сондай-ақ ауызашар дастарқанында Ақтөбе өңірінің зиялылары сөз алып, Діни басқарманың атқарып жатқан ауқымды істеріне тілектес екенін жеткізді. Кеш соңында ауызашар қонақтарына Рамазан сыйлығы табысталды.
