Бүгінгі қоғамда жиі еститін сөздер бар:
«Намаз оқымаймын, себебі Алла тағдырыма жазбаған», «Ажырасқаным тағдыр солай болғандықтан», «Кедеймін, өйткені жұмыс маған бұйырмаған» деген сылтаулар. Бұл ойлардың түп-төркіні – тағдырды дұрыс түсінбеуден туындайды. Тағдыр деген ұғымды бұлай түсіну – Алла мен Оның әділетіне күмән келтірумен тең.
Сонда тағдыр дегеніміз – Алла адамды намаз оқымауға, күнә істеуге, жалқау болуға мәжбүрледі деген сөз бе? Жоқ! Бұл – үлкен қателік әрі адасушылық. Ғалымдар ақида кітаптарында анық айтқан: адамның таңдау еркі бар, ол 100% өзіне жүктелген жауапкершілік. Иә, Алла барлық нәрсені біледі, бірақ адам өз еркімен таңдау жасайды. Сондықтан біз өзімізді алдамауымыз керек.
Жағдайымызды өзгерту үшін үш қадам қажет:
1. Тәубе – өткен қателіктеріміз үшін Алладан кешірім сұрап, шынайы түрде қайту.
2. Білім – дінді дұрыс түсініп, ақиқатты танып, жүрегімізді нұрландыру.
3. Амалы – әрекетке көшіп, еңбектену, намазды бастау, жақсылық жасау.
«Олар (өз еркімен) ауытқыған кезде, Алла олардың жүректерін де ауытқытты. Алла – бұзақы қауымды тура жолға салмайды».
Яғни, адам әуелі өзі ауытқиды, содан кейін Алла оның жүрегін қатаңдатады. Демек, кімде-кім тағдырды сылтау етіп жалқаулыққа, күнәға берілсе – ол өзін-өзі алдаған болады. Нағыз тағдырға сену – ерік берілгенін түсіну, соны дұрыс пайдалану. Қайтадан бастауға, түзелуге, амал етуге жол ашық.
материал «Стамбулдағы тәфәккур» кітабынан алынды,
ummet.kz
