«Үйге кіргенде, өздеріңе (яғни, үй ішіндегілерге) Алла Тағала тарапынан білдірілген (сендерді сауапқа бөлейтін) құтты да берекелі (әс-сәләму аләйкум деген сөзді айтып) сәлем беріңдер» («Нұр» сүресі, 61-аят).
Егер сендерге біреу сәлем берсе, сендер одан да артық ілтипат білдіріңдер немесе ол қалай амандасса, сендер де дәл солай амандасыңдар (яғни, егер біреу сендермен «әссәләму аләйкум» – деп амандасса, сендер оған «уа аләйкумус-сәләм уа рахматуллаһи уә бәракәтуһу» деп жауап беріңдер. Тіпті болмаса, сол сияқты сәлем беріңдер)» («Ниса» сүресі, 86-аят).
Абдуллаһ ибн Амр ибн әл-Ас (р.а.): «Бір адам Алла елшісінен (саллаллаһу аләйһи уә сәлләм): «Исламдағы ең игі іс қандай?» – деп сұрағанда, ол: «Қарны аш адамды тамақтандыруың және танысаң да, танымасаң да, жолыққан адамдарға сәлем беруің», – деп жауап берді», – деген (Бұхари, иман 6; Муслим, иман 63).
Бәра ибн Азиб (р.а.): «Алла елшісі (саллаллаһу аләйһи уә сәлләм) бізге: «Науқастың көңілін сұрауды, жаназаға қатысуды, түшкіргенге «йәрхамукаллаһу» (Алла сені мейіріміне бөлесін)» деп айтуды, айтқанын істету үшін немесе бір нәрсе сұрап ант-су ішкен адамның анты бұзылмасын деп айтқанына көнуді, жазықсыз жапа шеккен жанға қолұшын беруді, шақырған жерге баруды және өзара амандасуды кеңінен жаюды бұйырды», – деп айтты (Бұхари, мазалим 5; Муслим, либәс 3).
Әбу Һурайра (р.а.) жеткізген хадисте: «Алла елшісі (саллаллаһу аләйһи уә сәлләм): «Сендер толық иман келтірмейінше, жұмаққа кіре алмайсыңдар. Ал өзара сүйіспеншілікте болмайынша, толық иманға келмейсіңдер. Ендеше, араларыңда сүйіспеншілік тудыратын істі айтайын ба? Өзара сәлемдесіп, амандық сұрасуды кеңінен жайыңдар», – деп айтты» – делінген (Муслим, иман 93).
Имран ибн әл-Хусайн (р.а.): «Бірде біреу Пайғамбарымызға (саллаллаһу аләйһи уә сәлләм) келіп: «Әссәләму аләйкум» – деп сәлем бергенде, Алла елшісі (саллаллаһу аләйһи уә сәлләм) де онымен солай амандасты. Әлгі кісі отырғанда, Пайғамбарымыз (саллаллаһу аләйһи уә сәлләм): «Он» – деді дауыстап. Содан кейін тағы бір кісі келіп: «Әссәләму аләйкум уә рахматуллаһ» – деп сәлем бергенде, Алла елшісі (саллаллаһу аләйһи уә сәлләм) онымен де солай амандасты. Ол отырғанда, Пайғамбарымыз (саллаллаһу аләйһи уә сәлләм): «Жиырма» – деді дауыстап. Біраздан соң және бір кісі келіп: «Әссәләму аләйкум уә рахматуллаһи уә бәракәтуһу» – деп сәлем бергенде, Аллаһ елшісі (саллаллаһу аләйһи уә сәлләм) оған да дәл солай амандасып, ол отырғанда: «Отыз» – деді дауыстап», – деген (Әбу Дәуіт, әдәб 132; Тирмизи, истизан 2).
материал «Хадистер жинағы» кітабынан алынды,
ummet.kz