Ардақты Пайғамбарымыз (саллаллаһу аләйһи уә сәлләм) шынайы мүмінді «Жұрт малдарын да, жандарын да сеніп тапсыра алатын адал жан» деп түсіндірген.
Тағы бір хадисте: «Сендер маған алты нәрсеге кепілдік берсеңдер, мен де сендердің жаннатқа кіретіндеріңе кепіл боламын», – дей отыра, ол алты нәрсенің сөйлегенде өтірік айтпау, уәдеде тұру, аманатқа қиянат жасамау, ар-ұятты сақтау, харамға көз салмау және өзгелерге зиян келтіруден сақтану екендігін айтып өткен. Айналасына сенімділік сыйлай білуге шақыратын тағы бір хадисінде: «Араларыңдағы ең жақсы және ең жаман адамдардың кімдер екенін айтайын ба?» – деп сұраған кезде, пайғамбардың дегенін дер кезінде ұғып алуға тырысатын сахабалары бірауыздан: «Айтыңыз, уа, Расулалла!» – дейді. Сонда ардақты Пайғамбарымыз байыппен: «Ең жақсы адам – өзінен ұдайы жақсылық күтілетін, әрі басқалар одан қылдай қиянат келмейтіндігіне сенімді болған жан. Ал ең жаман адам – өзінен ешбір жақсылық күтілмейтін және өзге ел-жұрт одан қашан, қандай жамандық келер екен деп, қауіптеніп жүретін сенімсіз кісі», – дейді.
материал «Сүннет энциклопедиясы» кітабынан алынды,
ummet.kz