Хазірет Мұхаммед (с.а.с.) жындардың да пайғамбары ма?

Пайғамбарымыз (с.а.с.) Меккеде жүргенде жындар келіп Құран тыңдағандары жайлы қасиетті аятта: «Бір кезде саған жындардың бір тобын Құран тыңдауға жіберген едік. Олар сенің алдыңа келгенде біріне-бірі «үндемеңдер» десті. Құран оқылып біткеннен кейін олар өз қауымдарына ескертуші ретінде қайтты. Барып «Уа, жұртым, біз Мұсадан кейін түсірілген алдыңғы кітаптарды растайтын, ақиқатқа бастайтын кітапты (Құранды) тыңдадық. Уа, халайық, Алланың жаршысын (Мұхаммедті) қабылдаңдар және Аллаға иман келтіріңдер. Алла сендердің күнәларыңды кешіріп, жан түршігерлік азаптан құтқарады» делінген («Ахқаф» сүресі, 29-31) .

Кейбір деректерде Алла Елшісіне (с.а.с.) Құран тыңдау үшін жындардың бір рет келгендігі айтылса, енді бір жерде екі рет келгендігі білдірілген. Алла Тағала пайғамбарына жындарды ескертіп, оларға Құран оқуын әмір еткен еді. Сол себепті бірде сахабалардан Ибн Мәсғудты жанына алып, жын қауымына барған. Екеуінің хикметке толы осы жолғы сапарын Абдулланың (р.а.) өзі былай деп еске алады:
«Хаджундағы тау соқпағына барғанымызда Алла Елшісі (с.а.с.) жерге шеңберлеп сызды да, «Осы жерден тапжылма», – деп, өзі Құран оқи бастады. Артынша әлдебіреулердің айғай-шуы естілді. Мен расулаллаға (с.а.с.) бірдеңе болып қалмас па екен деп алаңдай бастадым. Жанымда тұрған ол көз алдымда көмескіленіп бұлдырай бастады. Сағымдай бұлдыраған бірдеңе арамызды бөліп тұрғандай көрінді. Тіпті даусын естуден қалдым. Артынша күннің бетін бұлт торлағандай болған қараңғылық бірте-бірте сейіле бастады да, көзімнің алды шайдай ашылды. Пайғамбарымыз (с.а.с.) менен не көргенімді білгісі келді, мен ақ киім киген өңі қара әлдекімдерді байқағанымды айттым. Пайғамбарымыз (с.а.с.): «Бұлар Нұсайыптың жындары», – деп түсіндірді. Демек, расулалланың (с.а.с.) адамдарға ғана емес, жындарға да хақ жолды үйретуге келгені хақ.

материал «Пайғамбарымыз жайлы 111 сұрақ» кітабынан алынды,

ummet.kz