21
Жексенбі, Шілде

һижри

Мәлик періштесінің міндеттері

Мәлик періштесінің міндеттері

Ақида
Жарнама

Тіршіліктің біз біліп-білмейтін бүкіл тетіктеріне жауапты періштелері болғаны іспетті Ұлы Жаратушының тозақта да Сүбхан (нұқсансыз) есімін көрсететін періштелері бар. Ол – Мәлик періштесі.

Мәлик періштесі – тозақ күзетшілерінен де деңгейі жоғары әрі олардың барлығына жауапты періште. Яғни, жұмақты Ридуан періштесі күзетсе, тозақты күзету осы Мәлик періштесіне бұйырылған. Пайғамбарымыздың ﷺ хадисінде: «Намаз оқып отыр едім. Бір дауыс «Мәлик (тозақты күзететін жауапты періште) періштесі сәлем күтуде» денілді. Артыма бұрылып сәлем бермекші едім менен бұрын сәлем берді»,[1] – деп Мәлик періштесімен кездескені айтылады. Құран аяттарында тозақтағы жауапты періштелер жайлы: «Ей, мүміндер! Өздеріңді әрі үй-іштеріңді отыны адамдар мен тастардан болған оттан қорғаңдар. Оның басындағы періштелер; жуан денелі, қатал. Олар, Алланың өздеріне берген әмірлеріне қарсы келмейді. Не бұйрылса, соны орындайды»[2]; «Оған он тоғыз (періште) қарайды. Тозақтың күзетшілерін періштелерден ғана қылдық...».[3]

Ақырет пен Құран аяттарын мойындамаған кәпірлерге Алла Тағала тозақ күзетшілері етіп он тоғыз періштенің бар екендігін ескертеді. Олар бұйырылған нәрсені қалтқысыз орындамақ: «Қарсы келгендер топ-тобымен тозаққа айдалады. Сондай-ақ ол жерге барғандарында тозақ есіктері айқара ашылып жауапты періштелер: «Сендерге іштеріңнен, өздеріңе Раббыларының аяттарын жеткізген және Алланың құзырына баратын бұл күнді білдіріп ескерткен елшілер келмеді ме?», – деп сұрайды. (Олар): «Әрине келді. Бірақ кәпірлерге лайық болған азап ақыретте шындыққа айналды» – дейді. Оларға: «Ішінде мәңгі қалатын тозақтың есіктерінен кіріңдер!» делінеді. Тәкаппарлардың орны нендей жаман»[4]; «Оттағылар, тозақтың сақшыларына: «Раббыларыңнан тілеңдер. Азабымыздан бір күн жеңілдетсін!» дейді. (Сонда тозақ сақшылары): «Сендерге елшілерің мұғжизалармен келмеді ме?» – деп сұрайды. Олар: «Иә, келді» деп жауап береді. (Сақшылар): «Ендеше жалбарыныңдар, кәпірлердің тілегі мүлде зая кетуде» дейді.[5] Сонда тозақтықтар Мәлик періште арқылы Алладан өздеріне өлім сұрайды.

Құранда бұл былайша баяндалады: «Сөзсіз күнәһарлар тозақтың азабында мәңгі қалады. Олардың азабы жеңілдетілмейді де олар онда күдер үзген түрде қалады. Біз оларға зұлымдық жасамадық, олар өздеріне зұлымдық жасады. Тозақтықтар: Ей (тозақтың сақшысы) Мәлик! Раббың ісімізді бітірсін дейді. Сонда сақшы: «Жоқ, сендер мұнда осылайша қаласыңдар», – дейді[6]; «Сондай Раббыларына қарсы келгендер үшін тозақ азабы бар. Нендей жаман орын. Ішіне тасталған сәтте, оның қайнап, күжілдеген дауысын естиді. Долданғандығынан жарылып кете жаздайды. Қашан оған бір топ (қылмысты) тасталса, оларға оның сақшылары: «Сендерге ескертуші келмеді ме?», – деп сұрайды. Олар: «Бізге ескертуші келуіне келді. Бірақ біз оларды жалған еттік те, «Алла (уәде еткеніндей) сендерге еш нәрсе түсірмеген. Сендер адасудасыңдар», – деп едік дейді. «Егер біз тыңдаған немесе ақылға салған болсақ еді, бұл жалындаған тозақтықтардың ішінде болмас едік», дейді. Сөйтіп, олар күнәларын мойындайды. Ендеше, жалындаған тозақтықтар оңбасын!»,[7] – деп баяндалады.

Бұл аяттардан тозақтықтардың осы періштелерді көретіндігін әрі олардың азап тартуға әбден лайық екендіктерін өздерінің де мойындағандарын көреміз.

Материал «Періштелерге иман» кітабынан алынды.

Ummet.kz


[1] Муслим, Иман, 278

[2] Тахрим, 66/6

[3] Мүддәсір, 74/30-31

[4] Зүмәр, 39/71-72

[5] Ғафыр, 40/49-50

[6] Зұхрұф, 43/74-77

[7] Мүлік, 67/6-11

Бөлісу: