19
Сейсенбі,
Наурыз

һижри

Қажылардың барлық күнәларынан арылып, тазаратыны рас па?

Қажылардың барлық күнәларынан арылып, тазаратыны рас па?

Сұрақ-Жауап

Мұсылман адамның дүниелік және ақыреттегі өмірін күрт өзгертетін қажылық ғибадаты Алла үшін орындалған жағдайда адамды күнәларынан тазартады, иманын өсіреді, жұмаққа жетуге себеп болады.

Қажылықтың мән-мазмұнын жете түйсініп, құлшылығын орындаған адам құдіретті Жаратушыны көріп тұрғандай иманын шыңдайды. Құлшылық етуге мұқтаж екендігін ұғынады, барға шүкір, жоққа салауат айтады. Адам өзінің күнделікті өмірінде сүйіспеншілік пен төзімділікті негізге ала отырып, өзін-өзі жетілдіреді, бойындағы ізгі қасиеттерін арттырады.

Қажылықтың ұлылығы мен игілігін пайғамбарымыз (с.ғ.с.) өз хадистерінде нақты жеткізген:

«Алла разылығы үшін қажылыққа барып, жаман сөз бен қылықтан аулақ тұрып, күнәға батпаған адам кісі ақысын жемеген болса, пәк болып оралады».

«Қажылық немесе ұмрада жүрген адам Алланың қонағы. Олар Одан не сұраса, Алла дұғаларын қабыл етеді, кешірім, кешіреді».

Қажылық пен ұмраны өз кезегімен орындаңдар. Себебі, осы екеі ұста көрігінің темір, алтын мен күмістен тот пен ласты кетіргеніндей кедейлік пен күнәларды кетіреді».

Рас, қажылықта кісі ақысынан басқа күнәлардың барлығы да кешіріледі, себебі, кісі ақысы – қарыз. Ал, қарыз тек өтелген немесе кешірілген кезде ғана жойылады. Ақының екі түрі болады: Алланың ақысы, оның ішінде намаз, ораза секілді ғибадаттар және кісі ақысы. Оған ақша, мүлік, ар-ождан жатады. Барлық тапталған құқықтар үшін адам өзі жауап береді. Осы дүниелік өмірде қайтарылмаған құқық пен қарыздар қиямет күні иелеріне қайтарылатын болады.

Дегенмен, ол күні құдіретті Алла Тағала осы өмірде тәубеге келген құлдарына рақымын түсіруі мүмкін. Осылайша, Алла Тағала тәубеген келген құлдарының дұғаларын қабыл етіп, олардың кісі алдындағы қарыздарынан да құтақарады және Өзінің шексіз рақымдылығымен, қайырымдылығымен кешіреді.

Қорытындылай келе, өзінің бұрынғы күнәларына шын жүректен өкініп, кешірілетініне үміттеніп қажылығын орындаған әрбір адам өзінің сұрағанына жетеді. Рухани ауыр күйзелістен арылып ауыртпалықтарынан құтылады, жаңа өмірге аяқ басады.

Алла жақсы біледі.

Бөлісу: